ძვირფასო მეზობლებო,

გუშინ შედგა შეხვედრა კიდევ ერთ სადარბაზოსთან. დარჩა ერთი სადარბაზო და გამოტოვებული „ზ“ სადარბაზო.

შეხვედრების დროს ამხანაგობის წევრის ზოგიერთ წარმომადგენელს აღმოაჩნდა მინდობილობა სასამართლოში, კრებაზე მონაწილეობის შესახებ. გაითვალისწინეთ, რომ რწმუნებაში უნდა იყოს ქონების განკარგვის უფლებამოსილებაც მითითებული.

გამოიკვეთა ერთი ტენდენცია _ ზოგიერთ წევრს სურს უფრო მაღალ სართულზე გადასვლა, ზოგი მზადაა 120 კვ.მ-ის მაგივრად 140 კვ.მ მიიღოს.

ნებისმიერი ასეთი ცვლილება ხორციელდება ინვესტორის მიერ, შესაბამისი თანხის დამატებით. თუმცა, იმ შემთხვევაში, თუ ეს მოხდება თსუ-ს ამხანაგობის წევრებს შორის, ამაში ინვესტორი არ ერევა.

ე.ი. ამხანაგობის შიდა ცვლილებები მხოლოდ ერთმანეთში მორიგებით ან გაცვლით შეიძლება მოწესრიგდეს.

გამომდინარე აქედან, საჭირო იქნება ერთმანეთთან დაკავშირება და შესაბამისი მონაცემთა ბაზის შექმნა.

ამ საკითხთან დაკავშირებით შეგიძლიათ მიმართოთ ამხანაგობის თავმჯდომარე სანდრო ჯორბენაძეს, რომელიც ინტერესების დამთხვევის შემთხვევაში დაგაკავშირებთ ერთმანეთს. ამ ინფორმაციის გასაჯაროვება მოხდება მხოლოდ თქვენი თანხმობის შემდეგ.

როგორც მოგეხსენებათ, მუშაობა დაიწყო „ბაუერის“ ტექნიკამ, რომელიც ბურღავს და ამზადებს ორმოებს ხიმინჯებისთვის:

კიდევ ერთი საკითხი

დღევანდელი ინფორმაცია სავარაუდოდ ამ საკითხით უნდა დაგვეწყო, მაგრამ მაინც ბოლოსთვის მოვიტოვეთ.

ძალიან ძნელია ამის თქმა აჟიტირებულ ბებია-ქალბატონებზე, მაგრამ არავითარ შემთხვევაში არ შეიძლება იმის უთქმელობაც, რასაც ეს ადამიანები აკეთებენ.

კონკრეტულად _ ერთი ქალბატონი ურეკავს ამხანაგობის წევრებს და ყოველგვარი არგუმენტების გარეშე, ცუდი შედეგების მოლოდინით უკივის მათ, არ მოაწერონ ხელი ინვესტორთან შეთანხმებას.

შეთანხმება სწორედ იმისთვისაა, რომ ინვესტორის მიერ დაფიქსირდეს ქონება თქვენ სახელზე. აღარ შევუდგებით სამართლებრივ განმარტებებს, რადგან ამ ადამიანებისთვის ძალიან ძნელია სამართლის ელემენტარული საფუძვლების გაგებაც კი.

იურიდიულ საკითხებთან ერთად არსებობს მორალური, ზნეობრივი, ადამიანური ფაქტორი.

ამ ქალბატონმა დაურეკა ამხანაგობის ერთ-ერთ ასაკოვან წევრს, რომელმაც სერიოზულად მიიღო არასწორი ინფორმაცია და მოუვიდა გულის შეტევა. 

საბედნიეროდ ეს ადამიანი დღეს შედარებით ნორმალურადაა.

მივმართავთ ამ და სხვა ქალბატონებს, აცნობიერებთ მაინც რას აკეთებთ ამით? დაფიქრებულხართ კი, შესაძლო სავალალო შედეგზე?