ძვირფასი მეგობრებო,

გთავაზობთ დღევანდელი დილის და საღამოს ფოტოებს.

დილი|თ დაახლოებით 12:00 საათზე გადაღებული ფოტოები:

სანაგვე ურნასთან შეგვხვდა დასუფთავების სამსახურის თანამშრომელი, რომელმაც გვითხრა, რომ მდგომარეობა გაუმჯობესებულია , ხალხი ნელ-ნელა სწავლობს, რომ ნაგავი ურნაში უნდა ჩაყაროს. ის დღეში რამდენჯერმე ჩამოივლის და ყრის ურნაში და იმედი აქვს, რომ რამდენიმე კვირაში გარეთ აღარავინ დაყრის:

ფოტოები გადაღებული ყიფშიძის ქუჩის მხრიდან „ზ“ სადარბაზოსთან:

ნგრევის პროცესი დღეს დილის 12:00 საათისთვის:

უკანა მხარის საავტომობილო გზა თითქმის დანგრეულია. დარჩენილია სულ მცირედი მოსანგრევი:

მესამე სართულის ფოტოები დილის 12:00 საათზე:

ფოტოები საღამოს 18:00 საათისთვის, სადაც მე-3 სართული აღარ არსებობს. დარჩა მხოლოდ ავტოსადგომები დასანგრევი:

სააღგომო დღეებში (პარასკევიდან) მშენებლობაზე იქნება სიწყნარე. ნგრევის პროცესი განახლდება სამშაბათს.

დღეს, დღის მეორე ნახევარში დაგვიკავშირდა ტელეკომპანია „ფორმულას“ ჟურნალისტი ნინო გაბისონია, რომელმაც განაცხადა, რომ აკეთებს გადაცემას ჩვენ მშენებლობასთან დაკავშირებით და სურვილი ჰქონდა ორივე მხარის პოზიციები დაეფიქსირებინა.

ჩვენი ამხანაგობიდან რამდენიმე ადამიანი შეხვდა ჟურნალისტს და ყუფშიძის ქუჩის მაცხოვრებლების პრეტენზიებთან დაკავშირებით გასცეს პასუხი.

რამდენიმე ადამიანმა ეჭვი გამოთქვა ტელეკომპანია „ფორმულას“ მიერ ობიექტურ გაშუქებაში, თუმცა ჟურნალისტ ნ.გაბისონიას შესაქებად უნდა ითქვას, რომ მან ფაქტობრივად დაარწმუნა ამხანაგობის წევრები მასალის ობიექტურად გაშუქების დაპირებაში.

ვნახოთ. იმედია ახალგაზრდა ჟურნალისტი თავის პირობას შეასრულებს. გადაცემა კი, „ფორმულას“ ეთერში უნდა გავიდეს შაბათს, 1 მაისს 20:00 საათზე.

არაობიექტური გაშუქების შემთხვევაში უფლებას ვიტოვებთ გავასაჩივროთ თვითრეგულირების მექანიზმით ან სასამართლოში.

ძვირფასო მეგობრებო,

ჩვენი ამხანაგობის წევრებო,

ყიფშიძის ქუჩის მაცხოვრებლებო,

წინასწარ გილოცავთ დამდეგ აღდგომის ბრწყინვალე დღესასწაულს!

გფარავდეთ უფალი!

ქრისტე აღსდგა!

ჭეშმარიტად!

 მოგესალმებით მეგობრებო,

ერგვარ ტრადიციად იქცა კვირის ბოლოს (შაბათს ან კვირას) მშენებლობის მიმდინარეობის შესახებ ფოტო-ინფორმაციის გამოქვეყნება.

ყოველთვის მნიშვნელოვანი წინსვლა შეიძლება არც იყოს, მაგრამ ასეთი ინფორმაციის  გაცნობა ძალიან მნიშვნელოვანია იმ ადამიანებისთვის, ვინც უბინაოდაა დარჩენილი, ვინც ქირით ცხოვრობს, ვინც ჯანმრთელობის მდგომარეობის გამო ვერ მიდის მშენებლობამდე, ვინც სახლიდანაც კი ვეღარ გადის და 40 წელია ელოდება სახლის აშენებას.

დღეს ინგრეოდა სამანქანო გზა:

წინა დღეებში ინგრეოდა „თ“ და „ი“ სადარბაზოს მე-4 და მე-3 სართულები:

თუ შევადარებთ 10 აპრილის მდგომარეობას, გვექნება ასეთი რეალობა:

10 აპრილის მდგომარეობა:

24 აპრილის მდგომარეობა:

 მოგესალმებით ყველას,

ჩვენმა ჭირვეულმა მეზობლებმა უკმაყოფილების ახალი ტალღა გააჩაღეს. იხ.:

https://www.manifest.ge/item/3263?fbclid=IwAR0HDo_l4seB3SL6UetUAiH8el4HH8qZbkInAfOYiOSz9hAk0hJ3gkrLseM

ამხანაგობის წევრებო, შებრძანდით ამ საიტზე და თქვენც გამოხატეთ საკუთარი მოსაზრება.

ძლიან ბევრ ტყუილებს და არასწორ ინფორმაციას აწვდიან გაუთვითცნობიერებელ ადამიანებს. 

განსაკუთრებით აქტიურობს ვინმე თეკო კაპანაძე, რომელსაც ვითომ ყიფშიძის ქუჩაზე შესტკივა გული. სინამდვილეში ბინის გაქირავება სდომებია და უცხოელებზე ვერ ვაქირავებო. გამოდის, რომ ადამიანს ფულის კეთება უნდა და ამისთვის მზადაა სულაც არ აშენდეს 40 წლის წინ დაწყებული მშენებლობა, ამდენი უბინაო ხალხი ისევ უბინაოდ დარჩნენ.

ჩვენ საიტს აქტიურად კითხულობენ და ნიშნის მოგებით აცხადებენ, რომ „ბაგები-504-ის“ თავმჯდომარე გვეუბნება თმენის ვალდებულება გაქვთო.

კიდევ ერთხელ უნდა შეგახსენოთ, რომ თმენის ვალდებულებას ამხანაგობის თავმჯდომარე კი არ ითხოვს, არამედ კანონი გავალდებულებთ.

რაც შეეხება „კოდალას“ მუშაობას, აქაც შეგახსენებთ, რომ გაგიწიეთ ხათრი თქვენივე თხოვნით დავედით 1 „კოდალის“ მუშაობამდე. გაგაფრთხილეთ კიდეც, რომ 3 „კოდალის“ მუშაობის შემთხვევაში 15 აპრილისთვის ყველაფერი დამთავრდებოდა, არ მოისურვეთ. ცოტა წინდახედულობა იყო საჭირო და დღეს „კოდალები“ აღარ იმუშავებდნენ.

თქვენგან განსხვავებით, „მზერას“ შენობა თანახმა იყო 2 ან 3 „კოდალას“ ემუშავა და ჩქარა დამთავრებულიყო.

რაც შეეხება ე.წ. „დიპლომატების“ სახლის ეზოში ჯიუტად მდგარ 2 ავტომანქანას. ერთის მძღოლი ქალბატონი ყოფილა, რომელმაც ისეთი სიტყვებით აგინა მუშებს, რომ ისინი განცვიფრებულები იყვნენ _ კაცისგან არ გაგვიგია ასეთი გინებაო. ვიმედოვნებთ ეს ქალბატონი კაპანაძე არ იყო.

ნგრევის დროში გაწელვა თქვენი ბრალია. დღესაც კია შესაძლებელი, რომ 10-12 დღეში დამთავრდეს ნგრევა, თუ 2 „კოდალა“ მაინც იმუშავებს ერთდროულად.

ნებისმიერ ადამიანს შეუძლია მივიდეს და დარწმუნდეს, რომ იმდენად დაბალი ენერგიით მუშაობს „კოდალა“, რომ შეუძლებელია ბზარები გაუჩინოს სახლებს. ხმაურიც განახევრებულია.

ყველანაირად ვითვალისწინებთ მეზობელი სახლების მოთხოვნებს (11:00-დან 18:00-მდე, კვირას ვისვენებთ, ნგრევისას ვრწყავთ) და მინიმალური ხმაურით ვმუშაობთ, მაგრამ მადლობლები მაინც არ არიან. 

პირიქით, იჩივლეს მერიაში მშენებლობის შეჩერებასთან დაკავშირებით. 

 ძვირფასო მეგობრებო,

გამომდინარე იქიდან, რომ ბოლო ინფორმაცია მოწოდებული იყო პარასკევს, გთავაზობთ დღევანდელ ინფორმაციას.

დღეს, ჩვენ მშენებლობაზე მიმდინარეობდა ნანგრევების გატანა ეზოდან:

„კოდალა“ ანგრევდა გარაჟში ჩასასვლელ საავტომობილო ძველ გზას:

ყიფშიძის ქუჩასთან სიახლოვეზე დარჩენილია ყოფილი „ზ“ სადარბაზოს მცირე ნაწილი მხატვრების მხარეს (მიწის გამყოფი კედელი უცვლელად რჩება):

როგორც იცით, ჩვენი კეთილი ნებით მერიას დავუთმეთ ტერიტორია ჩვენ წითელ ხაზებში _ სანაგვე ურნების დასადგმელად. ურნები ჩაბეტონდა და ამოქმედდა. რადგან ჯერ ჩვენი სახლი არ აშენებულა, ნაგვის გამოყენების საშუალება, კეთილმეზობლური ურთიერთობიდან გამომდინარე, დავუთმეთ ყიფშიძის 2-ის მაცხოვრებლებს. ისინიც იყენებენ ამ ურნებს, მაგრამ სამწუხაროდ შიგნით არ ყრიან და გვერდზე აწყობენ, რომელსაც შემდეგ ჩვენი მუშები და დარაჯი ყრიან შიგნით.

გვინდა მივმართოთ ყიფშიძის 2-ის მაცხოვრებლებს და მომჩივან ნატო ალხაზიშვილს: ცოტა უხერხულია, როცა ვანის რაიონის მაღალი მთის სოფლიდან ჩამოსული ჩვენი დარაჯი, ყიფშიძის ქუჩაზე, ვაკეში მცხოვრებ, მაღალ მატერიებზე მოსაუბრე ადამიანებს ელემენტარულ შენიშვნებს, რომ გაძლევთ, უფრო შესტკივა გული დანაგვიანებულ ქალაქზე და თავისივე ინიციატივით ასუფთავებს ურნის მიმდებარე ტერიტორიას თქვენი დაყრილი ნაგვისგან. 

ქალბატონო ნატო, იქნებ აუხსნათ თქვენი სახლის მაცხოვრებლებს, რომ მხოლოდ ფეხის დაჭერა და ურნაში ნაგვის ჩაყრაა საჭირო:

მშენებლობის ხედი ყიფშიძის ქუჩის ქვედა სამანქანო გზის მხრიდან:

ამხანაგობის წევრები ხშირად გვეკითხებიან იმის თაობაზე, თუ რატომ ამატებს ინვესტორი 4-მეტრიან ღობეს უკანა მხარეს მხატვრების სახლიდან, ე.წ. „დიპლომატების“ კორპუსის მხრიდან.

საქმე იმაშია, რომ ნგრევის დროს, ე.წ. „დიპლომატების“ კორპუსის მხარეს შეიძლებოდა გადავარდნილიყო მცირე კენჭები და ეს კენჭები მოხვდებოდა გარაჟის ქვეშ მყოფ 2 ავტომობილს, რომელთაც ცხვირი აქვთ გამოყოფილი სახურავის გარეთ. ჩვენმა მშენებლებმა სთხოვეს, რომ სხვა ადგილას გაეყვანათ ან უკან, ნახევარი მეტრით დაეხიათ ავტომობილები, მაგრამ ჯიუტად არ გაჰყავთ (ალბათ ტაქსით დადიან):

ამ მანქანების არგაყვანის გამო კეთდება 4-მეტრიანი ღობე _ დარჩენილი დასანგრევი ნაწილის უკან მთელ სიგრძეზე:

აქვე გვინდა მივმართოთ ე.წ. „დიპლომატების“ კორპუსის იმ მაცხოვრებლებს, რომლებიც გადმოხედავენ ჩვენ მშენებლებს, უყვირიან, აგინებენ და შუბლის გახვრეტით და ფეხების დაცხრილვით ემუქრებიან: ჩვენთვის უცნობია, რომელ ქვეყანაში მუშაობდნენ ან მუშაობენ დიპლომატებად და სად ისწავლეს ასეთი დიპლომატიური ენა, მაგრამ მსგავსი ქმედება დასჯადია საქართველოს სისხლის სამართლის კოდექსით:

მუხლი 151. მუქარა  

1. სიცოცხლის მოსპობის ან ჯანმრთელობის დაზიანების ანდა ქონების განადგურების მუქარა, როდესაც იმას, ვისაც ემუქრებიან, გაუჩნდა მუქარის განხორციელების საფუძვლიანი შიში, –

ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ან გამასწორებელი სამუშაოთი ვადით ერთ წლამდე ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით ერთ წლამდე, იარაღთან დაკავშირებული უფლებების შეზღუდვით ან უამისოდ.

2. იგივე ქმედება, ჩადენილი:

ა) ჯგუფურად;

ბ) არაერთგზის;

გ) დამნაშავისათვის წინასწარი შეცნობით ორსულის, უმწეო მდგომარეობაში მყოფის, შეზღუდული შესაძლებლობის მქონე პირის ან არასრულწლოვნის მიმართ, –

დ) ოჯახის წევრის მიმართ, −

ისჯება ჯარიმით ან საზოგადოებისათვის სასარგებლო შრომით ვადით ას სამოცდაათიდან ორას საათამდე ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით სამ წლამდე, იარაღთან დაკავშირებული უფლებების შეზღუდვით ან უამისოდ. 

უკანა მხარის დასანგრევი ნაწილის ფოტოები:

მშენებლობის საერთო ხედი ყიფშიძის ქუჩიდან: